080215呢篇要用乜嘢標題呀？

講吓呢次北京遊o既膳食，真係夠“齋”，終於嘗試到奶奶去年東北遊時糟糕o既膳食，除咗第一餐川菜(勁麻辣)係肉菜參半之外，其餘幾日每餐都有青豆炒青豆、冬瓜煮冬瓜、洋葱炒肉片(注意，一碟唔夠五片肉片)、辣椒(並唔係西椒)炒肉片(注意，亦係一碟唔夠五片肉片)、 滾冬瓜蛋花湯，幾日裏面只有一餐有小半隻雞，但雞好似煲完湯拎番上嚟斬件咁，我哋呢啲年紀咁“齋”就話冇乜所謂啫，十幾歲後生仔女點捱呀，有時會諗，莫非 外省餸菜唔啱廣東人口味？亦唯有咁樣安慰自己o既啫。好彩酒店雖然喺市郊，但附近亦有超市、食店之類，有兩晚返到酒店，零下八度都要出去再食過，一晚食餃 子，美味 ing~一晚火煱，十一個人都只係食咗二百幾蚊，食物又唔差，點解團費包嗰啲會搞到咁差架~
最尾嗰日上午，原本行程冇安排上午節目和午膳，因為有團友想去廟會，佢哋公司美其名話用旅遊車載我哋去，再包午膳，每位收百五，我哋十一個人唔想去，因為被呢幾日o既膳食嚇怕，而且百五實在貴，有啲人就話睇頭，去又得唔去又得(兩頭蛇)，導遊初時語氣勁差，話如果有人唔去就全部都冇得去，因為車出咗街唔會再返酒店接唔去o既人去餘下o既節目和去機場返港(呢句表達得唔好，因為實在太氣憤，懶得咬文嚼字)，下午團費包o既節目我哋冇得去之餘仲要自己搵車去機場，呢個當然唔可以啦，後來妹夫o既妹夫就提議每個家庭表態話實去定唔去，唔好再模稜兩可，最終大家都冇去，原來一直想去廟會o既只係兩個人，咁點解初時要搞到咁僵呢。