070318東涌吊車一日遊

春節旅行完回來就開始期待，業主立案法團搞 o既「東涌吊車一日遊」，其實喺妹夫o既妹夫佢住嗰度搞 o既，$170 ，行程順序：

旅遊車來回沙田至東涌吊車站，有一個鐘自由行東涌市集。

來回吊車。

來回東涌至大澳巴士，大澳午飯，八餸一湯，白飯任「裝」，冬菜蒸烏頭、白切雞、白灼蝦、生炒排骨、上素、生菜油菜、杏飽茹小棠菜、粟米羹、仲有一樣餸諗唔起，午飯前有一個鐘、飯後亦有半個鐘自由活動。

遊心經簡林，呢個第一次去，時間關係，遊完心經簡林之後，只係喺大佛外圍映相，冇行上去，亦冇入寶蓮寺參觀。

早上八點九沙田開車，下午四點半東涌回程，好過自己搵車搵食，我哋自己一行十人， 又係春節時原班人馬，只係少咗我個仔，我由天水圍去沙田 join 佢哋所以比較麻煩，但回程時我自己喺東涌搭車走，成班人都玩得好癲，所以又係大笑 o既一天。

大澳收獲，小蒸籠一個，$15，大一倍o既都只係 $18，但呢個小小的比較可愛。