隨影: 10月 2013

070730順德遊

今次由深圳返順德沿途發覺空氣比一年前好，以前所經之處遠方地平線上都有一層霧，有啲地方仲可以用沙塵滾滾形容，完全睇唔到遠方景物，今次冇霧冇沙塵之餘仲可以見番藍色o既天、藍色o既河、米色o既月光(曾經見過橙色o既月光)，但最唔慣仲係香煙味，今年天氣特別酷熱，好彩返去第一日，順德早上曾經落雨，但第二日早上八點就出猛太陽，喺酒店食完早餐，再去隔壁一個超市逛，完全冇收獲，約十一點半，堂弟車我哋一行五人去「錦華農業生態園」午膳，呢間嘢好似開咗幾耐吓，但我哋都係第一次嚟，環境清幽，最鍾意係池上o既蓮葉，可惜未有花，否則以蓮葉o既茂密度開滿荷花一定好壯觀，聽講仲有一個士多啤梨和薰衣草園，可惜我哋食完飯就要起行去「大良」搭車回「深圳」，冇時間，唯有寄望下一次，喺「勒流」去「錦華農業生態園」需約十分鐘車程，最好都係有車，否則就只有選擇打的一途，而且回程需要電招，因為由勒流到生態園沿途只有農莊或園藝場，完全冇民居，居民冇四輪都有兩輪，所以大多數都會自己駕車周圍去，兩點半去到「大良汽車站」，但星期日太爆滿，只買到之後o既第三班車車票，仲係僅餘最後幾個位，好彩，否則又要等，返到深圳再坐地鐵去東門，每次o既例行節目，當時我仲未覺累，但越行越感覺好好好累，過關非常的多人，又要小心行李車和 BB車，感覺就更累，返到屋企只係十點半，沖涼時覺得凍就知出事，今朝睇醫生，果然話感暑，天氣反常，醫生好生意啊！

070730順德─錦華農業生態園(手機照)

尋日中午喺「錦華農業生態園」午膳，經由荷花池上小橋去獨立小屋，即係貴賓廳，小屋裏面都由蕂蓆舖砌而成，靚就靚，但總覺得蕂蓆會否「藕」蝨，荷花池上荷葉非常茂盛，可惜未有荷花，池裏亦養有錦鯉，另外一邊有魚塘，相信係養嚟自家用。

走廊天花的磁燈

070730順德(手機照)

老爸忌日，返咗順德兩日，相片中古老兼殘舊建築物，以前呢條街係大街，記憶中應該係一個市場，亦係通往渡頭o既必經之路，而家就只剩通往渡頭，市場亦慢慢遷移到填魚塘得嚟o既新發展土地。

老爸家對戶的舊磚屋，以前聽老爸講過青磚起o既屋比紅磚堅固。

070718自由行

又做一日自由行同金紫荊映番張相。上一次嚟金紫荊係幾年前(超過五年)同埋老爸、十二叔、阿妹一齊，今年書展因為會展裝修，出口去咗呢度，要兜個圈，再上天橋至返到灣仔地鐵站。大熱天時，雖然天有 d 陰，但未到灣仔地鐵站就已經溶咗。

灣仔莊士頓道，去完書展，行嚟呢道搵食，無意中見到呢間大押，又係一間舊建築物。

070718幾個比較特別的攤位

HALL 1 裏面通道，發覺今年有好多出版社都揀横跨通道o既位置，上面大大個嘜頭，但我更鍾意「中國出版社」、「三聯」等等開放式設計，比較通爽。

商務「清明上河圖」o既銷售攤位，舊年已經見呢本書，但太貴囉~

070718書展行大運

實施人流管制o既後果，售票處裏面要行晒咁多條巷至買到飛。

買完飛出嚟，喺照片o既背面再上 Hall 5、 Hall 7，但原本我係想先去 Grand Hall，而家要先上 Hall 7，再由 Hall 7 落番地下，即本來o既會展入口，經舊路去 Hall 1，再上兩層至去到 Grand Hall，行餐死，其實可唔可以買完飛就落番地下去新翼呀！點解沿途要咁多食蕉點人上Hall 7 呢？買完飛到去到新翼 o既 Hall 1，差不多用咗大半個鐘，離譜。